الأقصى أقصانا - انتفاضة المدونين لأجل الأقصى

.

.

.

نقلاً عن مدونة مادز- كن جميلاً ومدونة تقليب نظر للأخ الزميل محمد لشيب من المغرب واللذان يقودان هما وبعض الأخوة الزملاء المدونين حملة قوية للتضامن مع المسجد الأقصى وتضامناً معهم جميعاً وانضماماً لهذه المجموعة الرائعة من الشباب الوطني، أنشر هذه الدعوة الطيبة التي أعدها الأستاذ محمد بنفسه للتسهيل علينا جزاه الله عنا كل خيرٍ

.

.

إن الاعتداءات الصهيونية على المسجد الأقصى تمثل خرقاً لكل المواثيق الدولية وانتهاكاً صارخاً لحقوق المسلمين ومقدساتهم

فالحفريات أسفل الأقصى المبارك والهدم الحالي لباب المغاربة أو باب النبي أمام صمتٍ عربيٍ ودوليٍ هو تواطؤُ واضحُ فانظر يا عالم إلى ما يفعله الصهاينة في المسجد الأقصى

نشهد العالم أجمع أن الأقصى أقصانا وكفانا بالتاريخ والجغرافيا شهيدان
لن نقبل أبداً بهدمه و لا حتى تقسيمه و لا تهويده
الأقصى ليس فقط للمقدسيين أو الفلسطينيين، الأقصى هو لمليار وثلاثمائة مليون مسلم في العالم

الأقصى في قلوبنا جميعا

يا شعب فلسطين الأبي نحن معكم بدعائنا بقلوبنا و بأرواحنا و ليكن شعارنا جميعا

أقصانا لا هيكلكم - مسجدنا لا معبدكم

جراج رمسيس انهدم يارجالااااااااااااااا - 45 مليون جنيه في الدوشار

.

.

مش عارف إذا اللي حايشوف الصورة اللي فوق دي حايعرف بتاعة إيه والا لأ، الصورة باختصار لجراج رمسيس اللي تم تقزيمه وإزالة 3 أو 4 أدوار منه لزوم الشياكة والقيافة. الإزالة تمت بطريقة بدائية للغاية يادوبك تناسب القرن الـ17 اللي احنا بنعيشه، يعني عمال بتكسر بالإيد وبلدوزرات واوناش

المشكلة الحقيقية مش في الإزالة، أنا مقتنع ألف في المية ان الإزالة واجبة لأن المبنى كان فاقد للناحية الجمالية تماماً، كتلة أسمنت قبيحة بدون روح وسط مباني قديمة مليئة بالفن والنقوشات والعمارة الإسلامية والشرقية الجميلة. عندك مبنى سكك حديد مصر نفسه وحقيقي كل المباني المجاورة، كلها تحف معمارية أصيلة
.

بقى يعني يشيلوا تمثال رمسيس ويسيبوا المبنى القبيح ده؟ أكيد لأ، ده كان لازم يشيلوه ويشيلوه ويشيلوه. هو حقيقي الإزالة ماكانش طبعاً سببها الرئيسي لاالشكل الجمالي ولا عمليات تنسيق القاهرة ولاكل الكلام الفاضي ده والا يعني اشمعنى ابتدوا بميدان رمسيس مالبلد كلها محتاجة تنسيق وتنضيف وبلاوي كتيييييير مالهاش عدد

.

السبب الرئيسي حسب مالناس بتقول هو في الحقيقة أمني لأنه زي ماهو معروف، عملية تأمين مواكب الناس المهمة اللي بتمر فوق كوبري 6 اكتوبر مش ممكن تتم مع وجود مبنى بالعلو ده والقرب ده من الكوبري. ماشي، مافيش مشكلة، عمليات التأمين مهمة سواء لمواكب مسئولين أو لأي حد أوحاجة، بس كان فين رأي الأمن أو حتى جهاز تنسيق العاصمة قبل البناء وساعة استخراج رخصة البناء؟
.

المشكلة الحقيقية هيا في إن عملية البناء اتكلفت فوق الـ 30 مليون جنيه مصري وعملية الهدم متوقعلها تقريباً حوالي من 6 لـ 10 مليون جنيه؟ يعني حوالي 50 مليون جنيه ضاعت في الهوا. طب مش كان ممكن الملايين دي كلها تعمل حاجة للناس اللي مش لاقية تاكل وبتعيش الأسبوع كله على شوربة الهيكل العظمي بتاع الفراخ اللي بيشتروه بكل اللي حيلتهم؟

.

بصراحة حاجة تخنق، يعني أنا افهم ان أخطاء زي دي ممكن تحصل في بلاد الدنيا

كلها، بس أكيد المخطئ بيتعاقب وتحقيق بقى ومحاكمة كمان لو لزم الأمر، عشان ماتبقاش الحكاية سايبة. بس الحقيقة بقى انها سايبة وسايبة جداً كمان، مش بس في حكاية الجراج دي، لأ وفي كل حاجة تقريباً

.

أوسخ وألعن تعليق قريته عن الموضوع ده كان من كاتب اسمه محمود أبو زيد بيكتب في الأهرام - الراجل اللي بيكتب في صندوق صغير كده وكل كلامه سجع - قال ياسيدي بيقولك إيه بقى؟ بيقولك ان القرارين كانوا صحيحين - يقصد قرار البناء وقرار الهدم - شوفوا ازاي؟ قال إيه، قرار البناء كان للضرورة واحتياج الميدان لجراج سيارات والهدم كان صحيح لأنه المبنى بيشوه الشكل الجمالي. طب وحياتكوا انتوا ردوا عليه، أنا أصلي مرارتي اتفقعت وأكيد لو رديت عليه حارتكب جناية

.

الخلاصة يعني ان الحكومة قررت انها شايفة ان البنا قرار سليم والهدم قرار سليم ومافيش حد غلط وعلقة تفوت ولاحد يموت وعيل وغلط بقى ماتبقاش نمكي وكبر كبر كبر غلوش غلوش غلوش وضاعت الـ 50 مليون جنيه على الـ 70 مليون غلبان وكان الله يحب المحسنين وكل مشروع حكومي وانتوا واحنا والحكومة والنظام بخير وصحة وسلام وفلوس كتييييييييييييييييييييييير ضايعة ومنهوبة

عيد حب سعيد عليكم جميعاً

.
.

هالة سرحان....................لاتعودي

على الرغم من كوني لست من عشاقها خاصةً في الفترة الأخيرة بعد تركها قناة دريم 2. لطالما أحببتها في برامجها الحوارية الجادة عندما كانت تقدم 3 برامج توك شو في وقت واحد على أني لم أكن أحب برامجها الترفيهية التي تستضيف فيها الفنانين والفنانات حيث كنت أحسها مبالغة بعض الشيء. على أي الأحوال، أحببتها أم لم تحبها لاتستطيع إلا أن تعترف - ولو بينك وبين نفسك - أنها مذيعة لامعة ومجتهدة حققت درجات عالية من النجاح وأستطيع أن أضيف أن هالة سرحان هي من كان وراء الشهرة الواسعة لقناة دريم 2 في بداياتها والأساس الذي قامت عليه. أذكر انه عندما انتقلنا للحياة في بريطانيا في عام 2002، كان من أهم العوامل في اختيار نظام الستالايت أن يتمكن من استقبال قناة دريم 2 فقط لمتابعة برامج هالة سرحان

.

ماعلينا، إيه بقى مناسبة الكلام ده، مناسبته الضجة الفظيعة والحملة الرهيبة اللي بتتعرض ليها هالة سرحان اليومين دول وبمناسبة حلقات بنات الليل التي تم تسجيلها من سنة تقريباً وإذاعتها على مر الأسابيع القريبة الماضية. القصة ببساطة تتلخص في إن البرنامج جاب 4 بنات بيعترفوا بإنهم بنات ليل وحكوا بقى تاريخ حياتهم وإيه اللي وصلهم لكده والأهم انهم - أثناء الفضفضة - قالوا ان أفراد الشرطة اللي المفروض انهم يقبضوا عليهم بيستغلوهم وبيستمتعوا بيهم بدل مايقوموا بواجبهم

.

اللي حصل بعد كده غريب وعجيب، البنات اللي كانت وشوشهم متغطية في البرنامج راحوا بلغوا النيابة والصحافة ان هالة سرحان ضللتهم وضحكت عليهم - بس من غير حاجة أصفرة - وبالتواطؤ مع معد البرنامج لقنوهم قال إيه كلام مش حقيقي ومش صحيح عن كونهم فتيات ليل بقى والبوليس وكل الحدوتة دي. طبعاً الصحافة والإعلام اللي دايماً شهيتهم مفتوحة للفضايح والإثارة ماحاولوش يتحققوا من الموضوع وطلع برنامج 90 دقيقة - قناة المحور - للمذيعين اللامعين معتز الدمرداش ومي وجاب البنات دول - الغلابة قوي والشرفا قوي قوي قوي، عشان يقولوا انهم ياحغرام ماكانوش عاغفين هما بيعملوا إيه، وإنهم بس كانوا غايحين يسقفوا بفلوس!!! المهم بقى عاديك، النائب العام ادخل وبقت قضية ومحاميين الحسبة كالعادة رفعوا كل أنواع القضايا، إيشي حسبة وإيشي قذف وسب وإيشي بعضشي، حاجة تمخول

.

المصيبة مش في كل ده، لأن طبيعي مادام فيه قضية النائب العام لازم يحقق، المشكلة ان الصحافة والإعلام وكبار الكتاب والمثقفين - أوهكذا بيدعوا - نزلوا سلخ في هالة سرحان ومعدي البرنامج وفورا ًأخدوا كلام البنات على إنه شيء صحيح وكلام يعتد بيه وله مصداقية بدون مايستنوا حكم المحكمة ولا حتى توجيهات النيابة في القضية أو إذا حيكون فيه إحالة أو لأ. الصراحة حسيتها مهزلة، مهزلة من تقريباً معظم اللي كتبوا أو اتكلموا في الموضوع ده عبر الصحف والفضائيات

.

أكيد لو اللي قالوه البنات ده حصل يبقى هالة وطقم المعدين يستاهلوا اللي حصلهم واكتر لأن دي تعتبر سقطة إعلامية من الدرجة الأولى تفقدهم المصداقية تماماً. بس كمان البنات دي لازم تتحاكم سواء ثبت على هالة وطاقم المعدين تهمة ما أو لأ. مافيش حاجة اسمها ان واحدة بنت عندها فوق العشرين سنة شريفة ومحترمة في مجتمعنا الشرقي تقبل تقول كلام سافل زي اللي اتقال ده على نفسها وحياتها كدب وبعدين تقول أوه، سوري، أنا آسفة قوي، أصلهم ضحكوا عليا، لأ بقى ياهانم انتي وهيا، دانتوا الواحدة فيكم لازم تتحاكم وتاخد حكم سجن حقيقي على القرف اللي انتوا ساهمتوا فيه ده وقبضتوا عليه 400 جنيه الواحدة وكلتوا بيتزا كمان

.

أما لباقي أعضاء النخبة المثقفة الي خوتانا ليل ونهار باقولهم عيب عليكم وكفاية قرفتونا، ماصدقتوا زميلة إعلامية بقالها 25 سنة في المجال ده حصلها مشكلة عبيطة مع عيال زي دي ونزلتوا فيها تقطيع وقصقصة. طب خليكوا عادلين واستنوا حكم المحكمة، مش ده اللي دايماً بتطالبوا بيه لنفسكم وحبايبكم؟ ولا هو حلال ليكم وحرام على خلق الله التانية

.

أما لهالة سرحان نفسها فبقولها ببساطة: يادكتورة ورغم اعتراضي على أسلوب طرح بعض القضايا في برامجك عموماً وبرغم عدم إعجابي الشخصي بحلقاتك الترفيهية عموماً، أنا لازلت أرى إنك إعلامية مميزة وأتمنى أن تثبت الأيام انك لم تكوني ضالعةً في ترتيب هذه الفضيحة حتى لاأخسر شخصياً إعلاميةً كنت أحبها وأحترمها. وأدعوك من هنا ومن مدونتي المتواضعة هذه بألا تعودي إلى مصر، إهربي بجلدك، إبق في دبي، أو اذهبي للبنان أو لأمريكا - مع إبنك - ولكن لاتعودي، فهناك يحترمون القانون وحرية التعبير والإنسان عموماً أكثر منا بزمان

رحلة العذاب للسينما والإستهبال الرائع لمجمع سيتي ستارز

.

.

.

نسيت اقلكم على المهزلة اللي حصلت في اليوم اللي رحت فيه السينما، لما دخلت فيلم خيانة مشروعة كان في واحدة من السينمات اللي في سيتي ستارز، مش قادر احكيلكم الزحمة كانت عاملة ازاي، حاجة فظيعة، سواءً في الشارع أو على مدخل الجراج. الغريبة الزحمة دي كلها مع إنهم رفعوا سعر ساعة الركنة لحد مابقت الساعة بـ 5 جنيه، مش عارف إمتى الناس حاتبطل تركن في الجراج؟ لما الساعة تبقى بـ 50 جنيه مثلاً؟

.

المهم ماصدقنا نزلنا بالعربية في الجراج وربنا لايوريكم بقى، زحمة والعربيات فوق بعضها طوابير وبقينا بنلف حلقلق عشان نلاقي أماكن بس هما مقفلين بحواجز والذي منه عشان تلاقي نفسك بتلف في نفس الدايرة الضيقة 5/6 مرات لحد ماابتدت الناس بقى تتخنق وتتعصب ويبتدي الخناق بقى. وابتدت العربيات تتكوم بقى جوه ممرات الجراج كإنك في نفق الأزهر أو على 6 اكتوبر ساعة الذروة وأعصاب الناس ابتدت تلتهب خصوصاً لما اكتشفوا ان أفراد أمن الجراج بيستهبلوا ويستعبطوا وبيلففوا الناس في دواير ضيقة. قام واحد راح نازل من عربيته وهات يازعيق وبهدلة في الأمن والإدارة.

ساعتها بس اتفضل البهوات بتوع أمن الجراج وفتحوا الدور الأرضي وسمحوا للناس انهم ينزلوا فيه وطبعاً الدور اتملى نصه عالأقل في اقل من 10 دقايق. بس بعد إيه، بعد مااتحرق دم الناس وكانوا حسبوا على كل واحد ييجي نص ساعة زيادة في حسابه

.

الحاجة طبعاً اللي حرقت الناس اكتر طبعاً انهم بعد هدة الحيل دي كلها اضطروا يقفوا في طابور طويل ييجي 15 دقيقة عشان يخشوا من بوابة ماكانتش متحضرة ولا متهيأة لاستقبالهم

الحقيقة مرواح سيتي ستارز بقى حاجة صعب جداً من الزحمة وكمان قلة ذوق وجليطة أفراد الأمن زودت الطين بلة، ماهو مش معقول الناس اللي ساكنة في مدينة نصر تاخد 10 دقايق عشان توصل السنتر وبعدين تاخد ساعة عشان تركن وتدخل جوة السنتر فعلاً. حاجة تقرف فعلاً. أنا شخصياً قررت مااروحهوش تاني إلا بقى الصبح أيام الأسبوع ماعدا الأجازات. واهي علقة تفوت ولا حد يموت

خيانة مشروعة........فيلم جيد لمخرج واعد

.
.

من باب التغيير قلت أجرب اخش سينما يمكن الواحد يقدر ينسى حالة القرف اللي بيعيشها اليومين دول من كتر الأخبار السيئة اللي بيسمعها سواءً التعذيب ولا الفساد ولا ولا ولا....إلخ. المهم دورت في الأفلام العربي اللي في السوق دلوقتي، وبعد ماقريت شوية عن تقييمات الأفلام قررت اني أشاهد فيلم "خيانة مشروعة" لسببين، أولهم إني من محبي إبراهيم عيسى، فقلت اروح اشوف عامل إيه في الفيلم،وتانيهم إني برضه من محبي أفلام خالد يوسف وبالتالي قلت ان الإتنين سوا في الفيلم لازم الفيلم يكون بيقول حاجة

.

المهم بقى اني فعلاً عجبني الفيلم قوي لعدة أسباب أولها انه فعلاً بيحاول يقول حاجة، يعني بيتكلم عن الفساد من منظور مختلف شوية عن باقي الأفلام

ثانياً الإخراج كان تحفة، أسلوب جديد خالص على الأقل بالنسبة للأفلام العربي، أنا ممكن اسميه أسلوب أو نظرية الرولركوستر، عارف لما تكون راكبه في الملاهي وياخدك في اتجاه معين بمنتهى القوة وبعدين مرة واحدة تلاقيك اتحودت - غيرت اتجاهك - مرة واحدة؟ أهو المخرج في الفيلم ده إتبع نفس الأسلوب، بياخدك في اتجاه تصور معين ويصورهولك بإتقان لدرجة إنك تتخيل إن هو ده الحقيقة ومرة واحدة ياخدك لتصور تاني خالص وهكذا، الحقيقة عجبني أسلوب الإخراج قوي قوي

الحاجة التالتة، التصوير، فيه لقطات وكادرات عجبتني جداً، خدمت الفيلم وخلت عين الواحد ماتغفلش من كتر جمال الكادر والصورة، خد مثلاً الصورة اللي فوق دي للأستاذ ابراهيم عيسى مع الفنانة مي عز الدين، لاحظ نعومة المنظر وبساطته مع انعكاس صورتهم في مياه حمام السباحة، الحقيقة منظر رائع والفيلم في مجمله فيه لقطات وكادرات كتير شدتني

الحاجة الرابعة بقى إن أداء هاني سلامة في الفيلم عجبني جداً - مع إني مش من معجبيه سابقاً - بس في الفيلم ده كان أداؤه أكثر من رائع، كنت طول الوقت حاسس انه بيمثل من قلبه لدرجة اني نسيت في أحيان كتيرة انه بيمثل

وكمان الفنانة الناعمة مي عز الدين الحقيقة انها أدت دور من أحسن أدوارها لحد دلوقتي - على الأقل من وجهة نظري الشخصية البحتة - حلوة بحتة دي؟ كانت عاملة شخصية بنت كل قوتها في نعومتها وصفاءها الداخلي، عملته حلو قوي، ياريتها تخليها في النوعية دي من الأدوار، بدل أيظن

نيجي بقى للحاجات اللي ماعجبتنيش في الفيلم، أولاً التحول الغير مفهوم لمحامي العيلة اللي قام بدوره الفنان سامح الصريطي، الراجل كان في أول الفيلم عمال يدي محاضرة في سياسة أكل العيش والإستفادة من كل المواقف بدون التقيد بالعدالة أو مقوماتها، وكان بيتكلم مع موظف - خالد يوسف - من موظفين مجموعة شركات أبو هاني سلامة يعني كده معناه انه محامي من النوع اللي يبيع ذمته في سبيل الإستفادة الشخصية، ومرة واحدة بعد المحاضرة دي انقلب 180 درجة وبقى محامي ضميره حي وبيدي دروس في الأخلاق والعدالة لهاني سلامة بدون أي مبررات من خلال الخط الدرامي للفيلم وده حسسني بنقطة ضعف في الفيلم مش عارف ازاي ماحدش خد باله منها

النقطة التانية طبعاً، عدم منطقية أو تقدر تقول واقعية أحداث الهجوم اللي قامت بيه سمية الخشاب ومعاها 2 بلطجية على مي عز الدين في الفيلا بتاعتها، أكيد في الحالات اللي زي دي، الهجوم مش بيكون باتنين بس، الأهم بقى هو إن هاني سلامة لما عرف بالهجوم عن طريق سمية الخشاب نفسها اللي بلغته بالتليفون، ورغم إحساسه بالخطر اللي حبيبته فيه، مافكرش يبلغ البوليس ولا حتى يستعين بشوية البودي جاردات - اللي كانوا حواليه طول الفيلم ماعدا في المشهد ده - وقرر انه يخلصها بنفسه ودخل خلص على البلطجية وقتل سمية الخشاب بالظبط ساعة وصول البوليس، طبعاً نهاية مكررة وضعيفة جداً جداً وغير متوقعة من خالد يوسف. يعني انا مش شايف انه ضروري نفضل نحافظ على صورة البطل القوي فتى أحلام البنات ونضحي في سبيل ده بواقعية الأحداث

النقطة التالتة بقى، هي ظهور الأستاذ ابراهيم عيسى في نفس دوره في الحياة كرئيس تحرير لجريدة الدستور، الحقيقة الدور كان مختزل زيادة عن اللزوم وكنت شايف انه - أقصد الدور - يقدر يشارك بدرجة أكبر من كده في الأحداث، خاصةً وإنه كان مختزل في دور المراقب والمعلق على الأحداث فقط بدون حتى أي انفعال عاطفي حقيقي بمجرياتها. مش عارف ده كان مقصود ولا لأ، بس انا ماحسيتوش دور منطقي أو كامل، طول الوقت كنت حاسس انه دور ناقص. أما بالنسبة لابراهيم عيسى نفسه، فأظن انه كان يامخطوف يا مخضوض من جو البلاتوه والتصوير، لأني حسيته باهت عن طبيعته اللي بنشوفها على التلفزيون وفي كتاباته في الدستور. يمكن كمان حكاية اختزال دوره بالصورة اللي شرحتها هيا اللي أثرت في أداؤه. عموماً الأستاذ ابراهيم عيسى مش ممثل في الأول وفي الآخر وده أول دور ليه ومااعرفش اذا كان ناوي يعيدها ولا لأ، بس انا اتمنى طبعاً انه يعيدها لأني من أكتر المعجبين بيه سواءً ككاتب وصحفي أو كمذيع لامع صاحب برامج شيقة وممتعة زي "عالقهوة" اللي كان على دريم واتمنع وبرامج كتير ليه

أنا قبل ماأنهي تعليقي عن الفيلم لازم اقول ان المكان اللي كان قاعد فيه ابراهيم عيسى وهاني سلامة ومي عز الدين وكان فيه تخت عربي ومغنى قديم كان مكان حلو جداً، وفكرته رائعة، بيفكرني بالبيوت القديمة في منطقة الحارات بدمشق واللي اتقلب كتير منها لمطاعم وكافيهات. أنا حاطط صورته فوق الكلام ده على طول، ياريت اللي يعرف المكان ده فين واسمه إيه بالضبط يقولي

أنا في النهاية لا ناقد سينمائي متخصص ولا حتى ممثل أو فنان من أي نوع، وعشان كده مش عايز حد يزعل مني في اللي كتبته، أنا شاهدت الفيلم كمواطن عادي وعجبني وكان ليا ملحوظات عليه حبيت أشارككم فيها. ياريت اللي عنده وجهة نظر في الموضوع ككل يقوللي عليها، أنا يهمني رأيكم جداً

ملحوظة مهمة: جميع الصور اللي في الموضوع أخدتها بكاميرا التليفون المحمول بتاعي علشان كده أكيد الصور مش واضحة بدرجة كبيرة، فياريت تعذروني لأن انتوا عارفين ان التصوير ممنوع في السينمات بس انا كان عاجبني المشاهد قوي ومااقدرتش امنع نفسي من تصويرها وأكيد المنتج حايسامحني لأن كان غرضي شريف والله