جريدة يومية هدفها الأساسي التعبير عن صوت أغلبية الشعب المصري الصامت منذ أبد وللأبد والتائه بين شتى الإتجاهات الفكرية والسياسية وبين احتياجاته اليومية. هي في البداية والنهاية صرخة هادئة من القلب للقلب.

السبت، مارس ٢٤، ٢٠٠٧

البقاء لله في حريتك يامصر..في عافيتك يامصر..في شعبك الطيب يابلدي

.
.

مش عارف اقول ايه، حاسس اني مخنوق عالآخر، مش قادر اشيل من قلبي ولا عقلي الحزن المسيطر عليهم نتيجة التحديث المزعوم للدستور المصري. مش ممكن يكون اللي بيحصل ده طبيعي، أنا مش عارف حتى المفروض اروح ادلي بصوتي ولا لأ. ياترى حد يقدر يقوللي المفروض الواحد يعمل إيه؟ لما تكون عارف ان أعز الناس عليك بيموت بيموت وماعادش قدامه غير ساعات، ومطلوب انك تحاول تلاقيله كيسين دم، ياترى حاتبقى متحمس أو مهتم أو سعيد لما تلاقيهم؟ والا حاتبقى بتدور وانت منهار من البكاء والحزن؟

أنا يمكن احاول اروح اصوت – أدلي بصوتي يعني – بس حاروح من باب اني اعمل اللي عليا، رايح وعارف ان بلدي مصر، اللي مافيش أغلى منها عندي بترابها ونيلها ونخيلها وأهم من ده كله، أهلها الطيابة، كل ده حايتغير في ظرف يومين. أنا مش عيوني اللي بتبكي، أنا كل خلية في جسمي وكل نفس في روحي بيبكي عليكي يامصر. ياللي كنتي تستاهلي أحسن من كده بكتير، ياللي كان ممكن تكوني منارة الشرق والغرب، ياللي كلبش في ودانك وعلى شرايين قلبك قراد، قراد بقاله أجيال بيمص في دمك وبيتحكم في نبضك وبيمنعك من الحرية والإنطلاق

شوية قرداتية، نطاطين حيطان، كدابين زفة، ماقلعوش هدومهم بس قلعوا الأهم منها، قلعوا برقع الحيا، قلعوا آخر ورقة توت كانت ساترة عوراتهم الأخلاقية والإنسانية، ورقة التوت اللي كان عليها شوية الخشا والحيا والخوف من الله اللي كانوا فاضلينلهم. شوية قرداتية بقالهم أسابيع بيحاولوا يبيعولنا التشويهات الدستورية على إنها تعديلات. ليه؟ ليه ياشوية نور؟ فاكرينا هبل؟ هطل؟ إحنا صحيح أغلبية صامتة، لكن صمتنا ده مش عجز، مش هبل، مش غبا. صمتنا ده انتوا اللي فرضتوه علينا، صحيح سكتوا لسانتنا بالخوف والقهر، سكتونا بالجوع والفقر، والتعليم المغشوش والأكل والشرب اللي ماليانين أمراض، سكتونا بالتعذيب وقلة الحيلة. بس لأ، سكوتنا ده بس باللسان، مش معناه ان احنا مش فاهمين وعارفين وفاقسينكم كلكم، واحد واحد، آسف، نطع نطع فيكم

تلاقي واحد من القرداتية يقولك ان المعارضة بتهول من التأثير السلبي للتشويه المقترح للمواد 88 و179 وإن حايبقى فيه إشراف قضائي على كل الإجراءات، قضائي ازاي يا...... ولا بلاش الواحد يشتم، إذا كنا النهاردة في ظل قانون الطوارئ عندنا آلاف الأحكام القضائية التي لاتنفذ من الحكومة أو تنفذ على الورق فقط؟ إيه ده؟ أنا لما باسمع حد فيهم بيتكلم باحس بمنتهى القرف والغثيان، ازاي واحد عنده فوق الخمسين أو الستين سنة، يعني رجله والقبر، والمفروض انه عمل إسم محترم ولو ماعملش يبقى دلوقتي كل اللي يهمه انه يعمله ويأكد عليه، يقف ويقول كلام زي ده؟ كإنه مش عارف احنا عايشين ازاي وفين، إزاي الناس دي بتقدر تقوم بالإستربتيز السياسي والأخلاقي ده في السن والمركز اللي هما فيه؟ يا أخي يلعن أبو الفلوس لأبو المركز اللي يخلي الواحد من دول في السن دي يخون أمانة الكلمة وأبسط مبادئ الأخلاق وحقوق الإنسان والوطنية والدين، اي دين

شوية القرداتية دول، فيهم صحفيين، وفيهم رجال فكر – بالإسم بس – ورجال قانون – برضه بالإسم بس – ورجال اقتصاد وأعمال ورؤساء نقابات ومذيعين ودكاترة جامعات ويمكن شيوخ كمان وأشكال كتير قوي من اللي بيطلعوا علينا بوشهم القبيح من شاشات التلفيزيون وأعمدة الصحف والمجلات وموجات الإذاعة، أنا خلاص ماعدتش باطيق حتى اني اسمع نبرة صوتهم ولا اشوف وش واحد فيهم حتى لو كان حايقرا قرآن. فلا أظن انه يجب عليا سماع القرآن عندما يتلى على ألسنة المنافقين المستنفعين الظالمين لخلق الله

مش عارف اقولك إيه ياصاحبي، ياللي محتار زيي، أقولك روح صوت وقول لأ ولا ماتروحش وقاطع، بس اللي انا أكيد منه ان كلنا بعد التشويهات الدستورية دي حانصوت حانصوت


ملحوظة: ده زجل بسيط حسيت بيه دلوقتي، يعني لسة طازة، كتبته من حر النار اللي في قلبي وقلت اشارككم فيه، مش عارف بس انا عمري ماكتبت شعر لاعامي ولا فصحى، بس بيتهيألي اني كتبت الكلام ده من تأثير الغليان اللي جوايا

أم المصايب

حزنك ماليني ياست الحبايب
ياللي ترابك ماليان عجايب
يامصر إصحي وفكي اللجام
ده انتي حبيبتي واعز القرايب
ياأمي يامصر ياغالية عليا
إصحي ودوسي برجلك مصايب
حطوا في إديكي السلاسل ياأمي
وانتي حرة برغم المصايب
حافضل ابكي عليكي بدموعي
واندب عليكي ياأمي ندايب
شلة من ولادك حقيقي جبابرة
واخدينك يامصر ياأمي سبايب
بيسبوا في شعبك ومصوا دمه
وخلوا نيلك ونخلك خرايب
ضربوا ولادك وهانوا الجميع
وعبوا كرمك وخيرك زكايب
بيعدلوا الدستور أخيراً ياأمي
عشان ماتكتر فيكي الزرايب
ويجف نيلك وتنشف مزارعك
ويحطوا في كل ركن من أرضك سدايب
عيني عليكي يامصر ياأمي
ياأغلى ماف حياتي برغم المصايب

التسميات: , , , , ,

الاثنين، مارس ١٩، ٢٠٠٧

المهزلة الكبرى في بلد كثرت مهازله - لاتعليق ولاعزاء للمصريين

.
.

التسميات: , , , , , ,

السبت، مارس ١٧، ٢٠٠٧

ندوة مدونون ضد التعذيب

.
.

أنا أولاً لازم اتوجه بالشكر لعلاء ومنال على دعوتهم ليا في الندوة الهامة دي، دي كانت فرصة هايلة للتعرف على مجموعة مميزة من المدونين وناشطي حقوق الإنسان في مصر. الندوة كانت بعنوان "مدونون ضد التعذيب" وكان بيديرها علاء سيف ووالده الأستاذ أحمد سيف الإسلام وممثل من جمعية المساعدة القانونية اللي استضافت الندوة. حضر الندوة علاء ومنال أصحاب مدونة منالعلاء ووائل عباس صاحب مدونة الوعي المصري ومحمد الشرقاوي صاحب مدونة ومالك صاحب مدونة مالكوم إكس والحاج جرجس صاحب مدونة وزينب صاحبة مدونة برضه وعدة مدونات ومدونين آخرين وممثلي جمعيات حقوق الإنسان العاملة في مصر زي مركز هشام مبارك والأستاذ جمال عن المجموعة العربية
.
.
الحقيقة علاء قام بمجهود كبير جداً في تنظيم الندوة ومحاولة ضبط إيقاعها، ونجح إلى حد كبير في تحقيق ده. الموضوع كان مهم جداً - مين منا مايهمهوش منع التعذيب والإهانة واستعمال القسوة في بلدنا - وهو ووالده أجابوا بشكل دقيق على أسئلة كتير اتوجهتلهم بخصوص تشريعات التعذيب في مصر وإمكانية ملاحقة المتهمين بالتعذيب محلياً ودولياً وأسئلة تانية كتيير قوي
.
.
المهم يعني ان علاء قام بحوالي 75% من الكلام والمشاركة والحوار، وعلى قد ماللي قاله مهم أكيد وأضاف كتير جداً للحاضرين على الأقل بالنسبة للي ماحضروش ندوات في الموضوع ده قبل كده. يشكر أكيد بس كنت اتمنى ان الفرصة تعطى لعدد أكبر من المشاركين للتعليق والحوار. عموماً مش مشكلة يعني، الجايات اكتر من الرايحات
.

.

نيجي للمهم بقى، موضوع الندوة نفسه. كتير قوي من الأفكار اللي اتقالت هايلة فعلاً، الندوة كانت بتتمحور حوالين عدة محاور منها تفعيل دور المدونين في التشهير بالتعذيب وفضحه على أوسع نطاق وكمان محور حماية المدونين من الجهات الأمنية اللي أكيد متربصة بيهم النهاردة قبل بكرة والأهم ازاي ممكن نصحي الناس النايمة ونخلي عدد المدونين المهتمين يزيد أكتر واكتر. الحقيقة كمان فيه أكتر من محور جديد انضاف على المحاور الأساسية اللي كانت موضوعة مسبقاً. أنا أضفت محور تغيير ثقافة الشعب اللي خلاص خد عالبهدلة وقلة القيمة وأصبح بيحس إنه لما يضرب قفا أو يتشتم مش مشكلة شيء عادي يعني. وفيه محور كمان جميل أضافه أحد ممثلي جمعية المساعدة وهو إن احنا لازم نركز في تغيير التشريعات لتشديد العقوبة على جرائم التعذيب والتأكيد على الفصل بين سلطات النيابة والداخلية

.

.

إتفق المدونون على عدة مقترحات سيتم مناقشة أولوياتها وآلياتها في لقاءات قادمة انشاء الله، المقترحات كلها جميلة ومهمة ومؤثرة، أنا أكيد مش فاكرها كلها، بس فاكر شوية، منها


محاولة نشر الوعي بالتعذيب والإساءة والإهانة وحث الناس على عدم قبولهم في التعامل مع الجهات الحكومية خارج نطاق الإنترنت

عمل سجلات بموظفي الحكومة من الداخلية وغيرها من المتهمين بالتعذيب للتشهير بهم على المستوى الإنساني والإجتماعي

توزيع قائمة بمحامي حقوق الإنسان الذين يستطيعون الدفاع عن المدونين وأرقام تليفوناتهم

المطالبة بحق المحتجز في القيام بمكالمة هاتفية فور حجزه ووضعها في حملة صحفية على المدونات

وغيره من الأفكار الجيدة التي لو تحققت لكانت إنجازاً فعلياً ولأصبحت في غاية التأثير على حالة التعذيب في مصر، فربما نجد بعض الضباط وقد صحا ضميرهم ورفضوا تنفيذ أوامر التعذيب كما فعلها ويفعلها زملاؤهم الإسرائيليون ضد الفلسطينيين والأمريكان ضد العراقيين

.


المهم الندوة كانت ناجحة جداً وحسستني بالتفاؤل لأن فيه شباب مانسيش القضية المهمة لكل فرد منا ولسة بيحارب فيها ونفسه طويل. ربنا يوفقكم ياشباب وانشاء الله كلنا معاكم ويوم ورا يوم انا متأكد ان ولاد بلدي حايفوقوا ويصحوا ويبتدوا يطالبوا بحقوقهم الكاملة والفضل ساعتها حايكون ليكم أكيييييييييييييد

التسميات: , , , , , ,

السبت، مارس ٠٣، ٢٠٠٧

رسالة لليونسكو دفاعاً عن المسجد الأقصى

.
.

هذه حملة نرجوا من الله أن تؤتي ثمارها في وقف وحماية المسجد الأقصى عن طريق إبلاغ اليونسكو برفضنا وعدم قبولنا بل وطلبنا صراحة بأن يقوم بدوره في حماية التراث الإنساني المتمثل في حرم المسجد الأقصى وكل مايحيطه من آثار ومقدسات لجميع الأديان
.
إذا أردت أن تشارك في الحملة برجاء الدخول لمدونة الأخ العزيز قاسم أفندي للحصول على كل المعلومات بما فيها كيفية الإشتراك والمساهمة في الحملة وغيرها
.
ولك جزيل الشكر على اهتمامك

التسميات: , , , , , , , ,

الجمعة، فبراير ١٦، ٢٠٠٧

الأقصى أقصانا - انتفاضة المدونين لأجل الأقصى

.
.
.
نقلاً عن مدونة مادز- كن جميلاً ومدونة تقليب نظر للأخ الزميل محمد لشيب من المغرب واللذان يقودان هما وبعض الأخوة الزملاء المدونين حملة قوية للتضامن مع المسجد الأقصى وتضامناً معهم جميعاً وانضماماً لهذه المجموعة الرائعة من الشباب الوطني، أنشر هذه الدعوة الطيبة التي أعدها الأستاذ محمد بنفسه للتسهيل علينا جزاه الله عنا كل خيرٍ
.
.

إن الاعتداءات الصهيونية على المسجد الأقصى تمثل خرقاً لكل المواثيق الدولية وانتهاكاً صارخاً لحقوق المسلمين ومقدساتهم

فالحفريات أسفل الأقصى المبارك والهدم الحالي لباب المغاربة أو باب النبي أمام صمتٍ عربيٍ ودوليٍ هو تواطؤُ واضحُ فانظر يا عالم إلى ما يفعله الصهاينة في المسجد الأقصى



نشهد العالم أجمع أن الأقصى أقصانا وكفانا بالتاريخ والجغرافيا شهيدان
لن نقبل أبداً بهدمه و لا حتى تقسيمه و لا تهويده
الأقصى ليس فقط للمقدسيين أو الفلسطينيين، الأقصى هو لمليار وثلاثمائة مليون مسلم في العالم



الأقصى في قلوبنا جميعا


يا شعب فلسطين الأبي نحن معكم بدعائنا بقلوبنا و بأرواحنا و ليكن شعارنا جميعا


أقصانا لا هيكلكم - مسجدنا لا معبدكم

التسميات: , , , , , , , ,

جراج رمسيس انهدم يارجالااااااااااااااا - 45 مليون جنيه في الدوشار

.
.

مش عارف إذا اللي حايشوف الصورة اللي فوق دي حايعرف بتاعة إيه والا لأ، الصورة باختصار لجراج رمسيس اللي تم تقزيمه وإزالة 3 أو 4 أدوار منه لزوم الشياكة والقيافة. الإزالة تمت بطريقة بدائية للغاية يادوبك تناسب القرن الـ17 اللي احنا بنعيشه، يعني عمال بتكسر بالإيد وبلدوزرات واوناش

المشكلة الحقيقية مش في الإزالة، أنا مقتنع ألف في المية ان الإزالة واجبة لأن المبنى كان فاقد للناحية الجمالية تماماً، كتلة أسمنت قبيحة بدون روح وسط مباني قديمة مليئة بالفن والنقوشات والعمارة الإسلامية والشرقية الجميلة. عندك مبنى سكك حديد مصر نفسه وحقيقي كل المباني المجاورة، كلها تحف معمارية أصيلة
.

بقى يعني يشيلوا تمثال رمسيس ويسيبوا المبنى القبيح ده؟ أكيد لأ، ده كان لازم يشيلوه ويشيلوه ويشيلوه. هو حقيقي الإزالة ماكانش طبعاً سببها الرئيسي لاالشكل الجمالي ولا عمليات تنسيق القاهرة ولاكل الكلام الفاضي ده والا يعني اشمعنى ابتدوا بميدان رمسيس مالبلد كلها محتاجة تنسيق وتنضيف وبلاوي كتيييييير مالهاش عدد
.
السبب الرئيسي حسب مالناس بتقول هو في الحقيقة أمني لأنه زي ماهو معروف، عملية تأمين مواكب الناس المهمة اللي بتمر فوق كوبري 6 اكتوبر مش ممكن تتم مع وجود مبنى بالعلو ده والقرب ده من الكوبري. ماشي، مافيش مشكلة، عمليات التأمين مهمة سواء لمواكب مسئولين أو لأي حد أوحاجة، بس كان فين رأي الأمن أو حتى جهاز تنسيق العاصمة قبل البناء وساعة استخراج رخصة البناء؟
.
المشكلة الحقيقية هيا في إن عملية البناء اتكلفت فوق الـ 30 مليون جنيه مصري وعملية الهدم متوقعلها تقريباً حوالي من 6 لـ 10 مليون جنيه؟ يعني حوالي 50 مليون جنيه ضاعت في الهوا. طب مش كان ممكن الملايين دي كلها تعمل حاجة للناس اللي مش لاقية تاكل وبتعيش الأسبوع كله على شوربة الهيكل العظمي بتاع الفراخ اللي بيشتروه بكل اللي حيلتهم؟
.
بصراحة حاجة تخنق، يعني أنا افهم ان أخطاء زي دي ممكن تحصل في بلاد الدنيا
كلها، بس أكيد المخطئ بيتعاقب وتحقيق بقى ومحاكمة كمان لو لزم الأمر، عشان ماتبقاش الحكاية سايبة. بس الحقيقة بقى انها سايبة وسايبة جداً كمان، مش بس في حكاية الجراج دي، لأ وفي كل حاجة تقريباً
.
أوسخ وألعن تعليق قريته عن الموضوع ده كان من كاتب اسمه محمود أبو زيد بيكتب في الأهرام - الراجل اللي بيكتب في صندوق صغير كده وكل كلامه سجع - قال ياسيدي بيقولك إيه بقى؟ بيقولك ان القرارين كانوا صحيحين - يقصد قرار البناء وقرار الهدم - شوفوا ازاي؟ قال إيه، قرار البناء كان للضرورة واحتياج الميدان لجراج سيارات والهدم كان صحيح لأنه المبنى بيشوه الشكل الجمالي. طب وحياتكوا انتوا ردوا عليه، أنا أصلي مرارتي اتفقعت وأكيد لو رديت عليه حارتكب جناية
.
الخلاصة يعني ان الحكومة قررت انها شايفة ان البنا قرار سليم والهدم قرار سليم ومافيش حد غلط وعلقة تفوت ولاحد يموت وعيل وغلط بقى ماتبقاش نمكي وكبر كبر كبر غلوش غلوش غلوش وضاعت الـ 50 مليون جنيه على الـ 70 مليون غلبان وكان الله يحب المحسنين وكل مشروع حكومي وانتوا واحنا والحكومة والنظام بخير وصحة وسلام وفلوس كتييييييييييييييييييييييير ضايعة ومنهوبة

التسميات: , , ,

الأربعاء، فبراير ١٤، ٢٠٠٧

عيد حب سعيد عليكم جميعاً

.
.

التسميات:

الثلاثاء، فبراير ١٣، ٢٠٠٧

هالة سرحان....................لاتعودي



على الرغم من كوني لست من عشاقها خاصةً في الفترة الأخيرة بعد تركها قناة دريم 2. لطالما أحببتها في برامجها الحوارية الجادة عندما كانت تقدم 3 برامج توك شو في وقت واحد على أني لم أكن أحب برامجها الترفيهية التي تستضيف فيها الفنانين والفنانات حيث كنت أحسها مبالغة بعض الشيء. على أي الأحوال، أحببتها أم لم تحبها لاتستطيع إلا أن تعترف - ولو بينك وبين نفسك - أنها مذيعة لامعة ومجتهدة حققت درجات عالية من النجاح وأستطيع أن أضيف أن هالة سرحان هي من كان وراء الشهرة الواسعة لقناة دريم 2 في بداياتها والأساس الذي قامت عليه. أذكر انه عندما انتقلنا للحياة في بريطانيا في عام 2002، كان من أهم العوامل في اختيار نظام الستالايت أن يتمكن من استقبال قناة دريم 2 فقط لمتابعة برامج هالة سرحان
.
ماعلينا، إيه بقى مناسبة الكلام ده، مناسبته الضجة الفظيعة والحملة الرهيبة اللي بتتعرض ليها هالة سرحان اليومين دول وبمناسبة حلقات بنات الليل التي تم تسجيلها من سنة تقريباً وإذاعتها على مر الأسابيع القريبة الماضية. القصة ببساطة تتلخص في إن البرنامج جاب 4 بنات بيعترفوا بإنهم بنات ليل وحكوا بقى تاريخ حياتهم وإيه اللي وصلهم لكده والأهم انهم - أثناء الفضفضة - قالوا ان أفراد الشرطة اللي المفروض انهم يقبضوا عليهم بيستغلوهم وبيستمتعوا بيهم بدل مايقوموا بواجبهم
.
اللي حصل بعد كده غريب وعجيب، البنات اللي كانت وشوشهم متغطية في البرنامج راحوا بلغوا النيابة والصحافة ان هالة سرحان ضللتهم وضحكت عليهم - بس من غير حاجة أصفرة - وبالتواطؤ مع معد البرنامج لقنوهم قال إيه كلام مش حقيقي ومش صحيح عن كونهم فتيات ليل بقى والبوليس وكل الحدوتة دي. طبعاً الصحافة والإعلام اللي دايماً شهيتهم مفتوحة للفضايح والإثارة ماحاولوش يتحققوا من الموضوع وطلع برنامج 90 دقيقة - قناة المحور - للمذيعين اللامعين معتز الدمرداش ومي وجاب البنات دول - الغلابة قوي والشرفا قوي قوي قوي، عشان يقولوا انهم ياحغرام ماكانوش عاغفين هما بيعملوا إيه، وإنهم بس كانوا غايحين يسقفوا بفلوس!!! المهم بقى عاديك، النائب العام ادخل وبقت قضية ومحاميين الحسبة كالعادة رفعوا كل أنواع القضايا، إيشي حسبة وإيشي قذف وسب وإيشي بعضشي، حاجة تمخول
.
المصيبة مش في كل ده، لأن طبيعي مادام فيه قضية النائب العام لازم يحقق، المشكلة ان الصحافة والإعلام وكبار الكتاب والمثقفين - أوهكذا بيدعوا - نزلوا سلخ في هالة سرحان ومعدي البرنامج وفورا ًأخدوا كلام البنات على إنه شيء صحيح وكلام يعتد بيه وله مصداقية بدون مايستنوا حكم المحكمة ولا حتى توجيهات النيابة في القضية أو إذا حيكون فيه إحالة أو لأ. الصراحة حسيتها مهزلة، مهزلة من تقريباً معظم اللي كتبوا أو اتكلموا في الموضوع ده عبر الصحف والفضائيات
.
أكيد لو اللي قالوه البنات ده حصل يبقى هالة وطقم المعدين يستاهلوا اللي حصلهم واكتر لأن دي تعتبر سقطة إعلامية من الدرجة الأولى تفقدهم المصداقية تماماً. بس كمان البنات دي لازم تتحاكم سواء ثبت على هالة وطاقم المعدين تهمة ما أو لأ. مافيش حاجة اسمها ان واحدة بنت عندها فوق العشرين سنة شريفة ومحترمة في مجتمعنا الشرقي تقبل تقول كلام سافل زي اللي اتقال ده على نفسها وحياتها كدب وبعدين تقول أوه، سوري، أنا آسفة قوي، أصلهم ضحكوا عليا، لأ بقى ياهانم انتي وهيا، دانتوا الواحدة فيكم لازم تتحاكم وتاخد حكم سجن حقيقي على القرف اللي انتوا ساهمتوا فيه ده وقبضتوا عليه 400 جنيه الواحدة وكلتوا بيتزا كمان
.
أما لباقي أعضاء النخبة المثقفة الي خوتانا ليل ونهار باقولهم عيب عليكم وكفاية قرفتونا، ماصدقتوا زميلة إعلامية بقالها 25 سنة في المجال ده حصلها مشكلة عبيطة مع عيال زي دي ونزلتوا فيها تقطيع وقصقصة. طب خليكوا عادلين واستنوا حكم المحكمة، مش ده اللي دايماً بتطالبوا بيه لنفسكم وحبايبكم؟ ولا هو حلال ليكم وحرام على خلق الله التانية
.
أما لهالة سرحان نفسها فبقولها ببساطة: يادكتورة ورغم اعتراضي على أسلوب طرح بعض القضايا في برامجك عموماً وبرغم عدم إعجابي الشخصي بحلقاتك الترفيهية عموماً، أنا لازلت أرى إنك إعلامية مميزة وأتمنى أن تثبت الأيام انك لم تكوني ضالعةً في ترتيب هذه الفضيحة حتى لاأخسر شخصياً إعلاميةً كنت أحبها وأحترمها. وأدعوك من هنا ومن مدونتي المتواضعة هذه بألا تعودي إلى مصر، إهربي بجلدك، إبق في دبي، أو اذهبي للبنان أو لأمريكا - مع إبنك - ولكن لاتعودي، فهناك يحترمون القانون وحرية التعبير والإنسان عموماً أكثر منا بزمان

التسميات: , , , ,